Para todas e todos os que camiñan polo noso país co desexo de que sigan camiñando e gozando desta marabillosa terra no 2012.
Bo Nadal!
16 dic 2011
Ruta das sobreiras do Faro (Oia-Viladesuso)
Este ano a ruta do cocido
non tocou polo interior, á beira do mar tamén hai marisco de cortello, así que
tocou facer a ruta das sobreiras do Faro, polas terras de Oia e Viladesuso; un
dos paseos máis bonitos que hai pola costa da nosa terra.
Ás nove da mañá do
domingo 11 de decembro saímos dende o mosteiro de Oia, monumento principal
deste concello, que data de mediados do século XII, para afrontar a subida aos
montes de Faro e Pousiño, na serra da Grova. A mañá comezou moi animada e moi
pronto empezamos a librarnos de roupa porque a subida facíanos entrar en calor.
Moi pronto puidemos apreciar o primeiro dos petróglifos cos que nos iamos
atopar e gozar das vistas porque o día estaba limpo. Seguimos camiño ata a
chegar a unha das fervenzas que máis auga traía e que nós bautizamos como a
fervenza do Suso. Alí fixemos a foto de grupo e logo continuamos a subida. Ao
chegar ao alto, paradiña para o bocata e foi cando empezou a pingar algo.
Seguimos ruta e paramos a ver o petróglifo dos danzantes, no que o amigo Telmo
sacou de papel e lapis (mellor dito papel carbón) para facernos a demostración
de cómo se descobre un petróglifo sen facerlle dano. A pesar de que a pedra
estaba mollada puidemos descubrir a figura do danzante (ou adorador, non se
sabe). De alí continuamos baixando ata entrar no “Espazo
Privado de Interese Natural (EPIN)” que son as sobreiras de Faro. Trátase dun
val cheo de sobreiras entre os montes Pousiño e monte do Faro polo que baixa o
río Broi, rico en fauna e flora silvestre cunha paisaxe preciosa, tanto dende o
fondo do val como dende os miradoiros que dan á costa.
Para rematar a ruta tivemos que vadear o río,
bravo como viña. Grazas aos valentes que axudaron ao resto do grupo non houbo
que lamentar danos maiores.
En canto cruzamos o río puidemos apreciar o
cheiro do cocido que nos agardaba en “Casas do Sobral”.
Despois de repoñer forzas cantámoslle o “parabéns
para ti” a Manolo, que estaba de aniversario, e agasallárono cunha foto do
grupo. Xa metidos en faena, e logo dunha pequena actuación do coro mixto
Ponteareas-Matamá, os “Soutiños” deron comezo á sesión de baile, na que
participaron moi activamente os máis pequenos do grupo, incluído Xián, que fora
presentado no anterior cocido.
Rematou unha xornada moi agradable, con bo
ambiente coma sempre, e despedímonos desexando unhas boas festas e ánimo para
seguir camiñando no 2012 (a pesar da crise).
5 dic 2011
Próxima andaina "Sobreiras do faro - Oia"
17 nov 2011
Canóns do río Mao (Parada de Sil)
O pasado domingo 13 de
novembro, ás 8 da mañá, os andaríns do Souto do Vello dispúñanse a saír dende
Matamá con dirección a Villariño Frío, no concello de Montederramo, provincia
de Ourense, para facer o percorrido polos canóns do Mao ata a súa desembocadura
no río Sil.
Ao chegar á altura de
Castiñeira deixamos o autobús. Recibiunos un forte vento que nos anunciaba unha
chuvieira que logo non chegou (só un pouquiño para poder darlles uso aos
chuvasqueiros que levamos).
Principiamos a andar e
cruzamos a aldea de Praducelos con dirección á ponte de Conceliñas, o noso
primeiro punto de interese. Tal e como nos anunciara o noso guía (non só
espiritual) a ponte está un pouco deteriorada. O enxeñeiro Lucho e mais o xefe
de obra Poli encargáronse de certificalo.
Aquí fixemos a primeira
parada para repoñer forzas e prepararnos para gozar da fermosura da paisaxe que
viña a continuación.
Comezamos a baixada pola
canle da antiga fábrica da luz. Por veces víase alá abaixo o río Mao, outras
adiviñábase. O vento seguía soprando e facendo ruído, sobre todo ao pasar por
debaixo do tendido eléctrico. Apareceu a chuvia, pero sen chegar a molestar
moito. O amigo Suso protestaba porque baixabamos moi ás présas e non parabamos
a contemplar a paisaxe. Tiña razón!
Con todo isto chegamos á
necrópole de San Lourenzo. Cruzamos a aldeíña e empezamos a baixada a través
dos viñedos para chegar á fábrica da luz, que está en proceso de renovación,
seica para convertela nun centro de interpretación e mais albergue xuvenil.
Alí paramos a comer xa
cun día espléndido de sol.
Tralo descanso reanudamos
a marcha para ir pola pasarela construída toda en madeira ata case a
desembocadura. Continuamos camiño pola beira do río, atravesamos a aldea de
Barxacova e continuamos, pero xa á beira do río Sil.
Desde aquí se observa unha
vista impresionante dos viñedos da Ribeira Sacra, tanto a unha beira coma a
outra, e que sobre todo nesta época do ano, teñen unhas cores espectaculares.
Rematamos a andaina á
altura da adega Valcar en Sacardebois, que moi amablemente, nos convidaron a
uns viños. Como dicimos por alá: mel nas filloas!
Quedounos un bo sabor de
boca, non só polo viño senón tamén pola bonita andaina que nos preparou a
organización. Chapeau!
3 nov 2011
Próxima saída “Canóns do río Mao” (Parada de Sil)
O vindeiro domingo 13 de
novembro os andaríns do Souto do Vello desprazaranse ata Villariño Frío, na
provincia de Ourense, para facer o descenso polos canóns do río Mao ata a súa
desembocadura no río Sil.
A saída será ás 8 da mañá
dende o torreiro de Matamá.
Paisaxe con vistas espectaculares sobre o canón do Sil, Forcas, pasando pola ponte medieval
de Conceliñas, a canle da antiga fábrica da luz, a necrópole
do Medievo de San Vítor de Barxacova, unha das máis extensas e importantes do
NE peninsular, as pasarelas de Barxacova e a desembocadura no río Sil.
Suscribirse a:
Entradas (Atom)